Euskaltelek 2012ko babes-kontratua sinatu du Virginia Berasategi triatletarekin.
Denboraldi honetarako, bi proba ditu helburu Virginiak: apirilaren 22an Hegoafrikan egingo den Iron Man lasterketa (triatloiko probarik zorrotzena da) eta uztailaren 29an Gasteizen egingo den distantzia luzeko triatloiko munduko txapelketa.
Euskaltelek babesletzaren alde egiten duen apustuaren onuradunetako bat da Virginia, beste hauek bezala: Josune Bereziartu eta Pou anaia eskalatzaileak, Unai Basurko nabigatzailea, Garazi Sánchez surflaria, Mª José Sardón harri-jasotzailea eta Londresen egingo diren 2012ko Olinpiar eta Paraolinpiar Jokoetarako prestatzen ari diren BAT Basque Team-eko kirolariak. Guztiak dira emakumezkoen kirola babesteko eta talde horretako kirol egokitua babesteko Euskaltelek egindako ahaleginaren erakusgarri.
